Entrevista cu Señor Anthony Giel

Señor Anthony con ta bai. Danki pa bo tempo pa un intrevista chiquito.  Conta nos algo di bo persona.

Waw si mi bai conta algo di mi persona, lo mi jena full un buki di mi bida J.  Laga mi purba hasiele mas cortico cu por. Mi a nace na Aruba y ta bin di un Famia di 4, Tata, Mama y un ruman muher. Cu mi 18 aña mi a dicidi di bin Hulanda pa sigi studia, pero promer cu tur esei, mi a wordo conseha door di difunto Betico Croes pa bai Hulanda pa mi futuro. E tabata e periodo cu e refeneria di LAGO a sera y na unda basta Famia a perde trabao cu tabata traha den LAGO. Mi tin di bisa cu e tabata un di e mihor conseho nan cu mi a jega di haya y cu te cu dia di awe cu mi no ta regret di a hasie. Despues di a caba algun studio, mi a cuminsa traha na un compania cu jama Eurasem cu awe ta Euratec. Un compania cu ta traha “Chips” di computer. Durante e periodo trahando na Eurasem mi a mira un vacatura procedente di Cas di Aruba (Het Kabinet van de Gevolmachtigde Minister van Aruba)  situa na Den Haag, na unda nan tabata tin mester di un persona na e receptie. Mi a haya esei bastante interesante y alaves un oportunidad pa por drenta y traha cu mi mesun hende nan “Arubiano” anto den Hulanda. E temporada ei mi tabata biba na Nijmegen y mester a pensa mi mes bon si lo ta posibel. Mi a dicidi pa bai pa e challenge aki y mi por bisa cu e aña aki mi a cumpli 27 aña den servicio di Land Aruba. Actualmente mi function ta Systeem en Netwerk Beheerder y alaves e Facilitair Manager na Cas di Aruba. Tabatin un temporada cu mi a traha den e departamento Juridico cu dos jurist, den e departamento di Archief, Onderwijs te asta Welzijn unda mi tabata busca patient nan for di Schiphol y hiba nan hospital pa asina tradusi pa algun di mi paisano nan cu no ta domina e hulandes pa nan operacion cu nan ta bin hasi. Leu a leu mi ta val in como chauffeur di minister ora e ta desea. Pues despues di tanto aña den Cas di Aruba ta minister of directeur so mi no a bira i un trabow varia cu mi por bisa cu mi tin hopi goso den dje. Y lew a lew su challenges nan tambe. Fuera di mi trabow di tur dia mi ta vrijwilliger na BuddyNetwerk judando persona nan cu ta terminal of ta sufri di malesa nan chronico. Mi tin di bisa e no ta un trabao facil, paso bo ta deal cu personan nan cu ta den nan delaster fase di bida. Mi mes ta un persona basta alegre y mi ta purba di “Cheer nan up” cu mi alegria y storianan. Alaves mi ta hasi vrijwilligerswerk y ta miembro di Rode Kruis aki na Hulanda. Mi a dicidi di bira miembro, debi cu mi ta gusta juda hende den caso nan di emergencia y Rode Kruis ta un instancia hopi importante pa full comunidad mes, te asta e minister di Onderwijs kier hasi esei cu normalmente tur mucha na skol mester sa di dje. Cual mi ta haya un super bon iniciativa. Mayoria biaha mi ta bai juda na evenementonan grandi y chikito pa esnan cu mester di e prome auxilio. Y last but not least como mi hobby pa mi relax mi ta gusta tur sorto di musica. Pesei mes mi a dicidi di lanta un banda musical cu awe jama “Saborrr” cu tres “R”. Unda mi por disfruta con e entregante nan ta toca pa entretene e publico y sin cu nan sa mi mes un persona cu ta tocando cu nan. Esei ta un tiki dimi y mi por bisa mi ta Enjoy mi Bida tur dia and I Love it. Y pa mi no lubida un persona hopi importante den mi Bida, tur esaki mi no lo por a logra sin e sosten di mi casa esta SheilaE. E ta steun mi den tur cos y nos ta disfruta di otro tur dia. E ta mi partner in crime en door dik en dun.

Den cua aña boso a lanta e grupo Saborrr i con bo por definí bo banda mas mihor?

Grupo Saborrr a lanta na aña 2005. Promer cu esei mi tabata tin un banda caba cu nos a hinca den otro, pero e tabata tin un otro nomber y eigenlijk diferente nomber. Pero despues di keda pensa mi a dicidi di dune e nomber Saborrr cu tres R  cual e dos “r”nan ta nifica Ritmo Rico of Rijke Ritme.

Difinicion di mi banda ta asina aki: Durante di e periodo di Pasco den december, (nos tur cu ta bin di Aruba) a lanta cu Gaita y Aquinaldo, pues na Hulanda tabata hopi dificil di por topa un banda cu ta toca e tipo di musica aki. Un dia mi tabata na Rotterdam y a scucha e banda “Chicas Gaiteras” y a gusta con nan a toca y canta. Y djei ami a dicidi cu mi tambe ta desea di por toca e tipo di musica nan aki na Hulanda. Mi a logra di haya un paar di musico di Aruba cu gusta toca y canta e Gaita y Aguinaldo cu nos conoce y asina e banda a lanta. Hasta un tempo e banda tabata jama “Saborrr Gaiteros”. Despues bo ta hayabo cu hendenan a gusta nos sonido asina hopi cu nan tabata puntra si nos por toca pa Bruid of hasimento di aña. Esei a pone cu nos a dicidi di ban hasi algo den nos grupo y jena nos repertorio cu mas canticanan bailable y tur esaki ta LIVE dus sin computer. Tur esei pa no lubida e toke di nos islanan den Caribe Aruba, Corsow y Boneiro.

Actualmente ja pa basta aña nos Grupo ta toca pa stichting “Nos Baranca” bao guia di sra. Mena Maduro pa e temporada di Fiesta di San Juan “Dera Gai” brindando e publico un dushi atardi. Otro tradicion di nos cultura na unda Saborr tambe gusta participa o toca ta na nos “Dande Festival”. Hasta un biaha mi mes persona a participa basta añas pasa na e Dande Festival na unda mi a logra gana e copa tambe, imaginabo ja mi mes no a spera esei, pero hopi satisfecho y orgulloso di a logra esei, segun mi esei tabata na 2003. Mi mester bisa unda cu tin cosnan pa y di nos dushi Aruba lo mi tei pasobra esei ta algo di nos y e ta parti di nos. Dus nos tin cu sigi sostene e tradicion di nos cultura.

Cuanto persona ta toka cu Saborrr?

Debi cu nos ta un grupo cu ta toka “LIVE”, pa cada instrumento mester su tocado o musicante. Mi tin di bisa cu pa cada toca ta un challenge grandi pasobra no ta tur entregante lo por toca e dia cu tin un toca. Mayoria ves nos grupo ta consisti di 13 tocado, pero si mester bin trompetista aserca ( cual esei ta masha poco) e lo bira un orkesta completo y dimes mas grandi. E idea tras di e banda ta pa duna nos musicantenan di Caribe e oportunidad pa toca aki na Hulanda, mi mester bisa cu e musicantenan ta di nos dushi islanan di Aruba, Corsow, Boneiro, St.Maarten, Saba, hasta nos a jega haya tocado di Santo Domingo y Suriname. Hopi di nos musicantenan ta studiantenan biba aki na Hulanda y na unda e doel ta pa duna esnan cu ta musico y ta bin studia aki un chens pa nan sigi den nos musica crioyo y tradicional. Actualmente mi tin 2 musicante cu ta forma parti di Grupo Saborrr kende nan ta Jaderick Croes y Xavier Geerman. Ta musicantenan cu a studia na un conservatorium y a cabe y na unda awe ta demostra nan talento conhunto cu e Grupo Saborrr. Pami esei ta un previlegio y ta sinti como Arubiano hopi orgulloso di tur mi integrante nan. Mi ta haya cu ta di suma importancia pa sigi tene e tradicion di nos Cultura musical di Aruba of di Caribe mes halto y hasi algo cu ne pasobra ta di nos e ta. Esei ta e idea tambe tras di Grupo Saborrr pa duna e oportunidad ei na cada musicante cu ta mustra nan interes den nos tradicion y cultura y tene na bida. Un super danki tambe mi kier a duna na un otro integrante cu ta mi manager di e banda cu ta Indirah Burke. Indirah ta hasiendo un tremendo trabou cu hopi amor y incansabel pa e Saborrr sigi cu e spirito bibo di musica y ta hasie semper cu un energia cu e so tin. Su esfuerso incansabel pa cu e trabow logistico pa asina tur e integrante nan di Grupo Saborrr bin cu e energia positivo pa pone un show manera nos ta desea. Y asina Saborrr ta un label cu mi ta full orguyoso di dje. Un danki inmenso na boso tur como integrante nan y vooral tambe na e publico cu ta scucha nos ora nos duna nos show.

Kiko mas bo ta hasi banda di bo bida como Artista? Fasil pa contesta esaki, wak e pregunta 1 hahaha. Gosa di bida !!!

Cua ta e fiesta di mas mihor cu bo jega di toca i pakiko?

Wow un pregunta difisil……Pero fasil pa contesta. Cada fiesta tin su caracter y su ambiente, pesei mihor mi splike asina. Mi por bisa cu un biaha nos a jega di toca cu 5 integrante so na un instancia cu jama “Nos Aquamarino”, e ta un cas pa hende nan grandi (ouderen woning complex) cu ta desendiente nan di Aruba, Corsow y Boneiro situa na Den Haag y einan nos a bai toca temporada di Pasco mi ta corda. Wel e tabata un feeling tremendo cu un super bon ambiente, paso ta parse cu nos tabata toca y canta pa nos Wela y Welo nan. Imagina bo nan a disfruta y nos tambe a disfruta. Un win win situacion. Wel manera nan sa bisa e tabata un ambiente di kita sombre….inolvidable cu te dia di awe ainda nos ta papia di dje. Y pa mustra e otro banda di medaya. Ta ora nos toca na un Festival manera un ARUBADAG na unda bo ta haya un publico hopi mas grandi cu miles di hende, na unda e situacion ta full otro. Pero cu un Super Dushi Ambiente. Dus den tur dos forma nos tur di SABORRR ta disfruta di e ambiente cu ta presente. Dus con sea cu e ta grandi of chikito ta gosamento tin y unda tin goso tin bailamento.

Na unda abo tin gana di hasi un presentashon cu bo banda?

Semper mi tabata tin e deseo pa por toca na lugarnan grandi p.e. Heineken Music Hall na Amsterdam of AHOY na Rotterdam y esei a logra tambe na tur dos ocacion na unda e Festival di Arubadag a tuma lugar. Pami e sigiente challenge lo ta na Antilliaanse Feesten ……bo no sabi nunca pero kisas e ta na caminda.

Anthony danki pa bo tempo. Kiko bo kier bisa nos Arubianonan aki na Hulanda i Aruba. Kiko ta bo kenseho?

Na promer lugar mi kier a gradici bo persona Roy pa e oportunidad Brinda, na mi persona, pa e entrevista aki. Loke mi por bisa na nos Arubianonan biba aki na Hulanda ta cu aunke nos por ta un pais chikito den Caribe, semper keda apoya nos Cultura y nos Tradicion, unda cu nos por ta den e mundo aki. Mi conseho ta pa sigi apoya y encurasha nos muchanan cu nos bunita Cultura pa asina nos musica y nos tradicion nan no muri. Corda ta un Aruba nos tin, e por ta chikito pero pa nos e ta nos pida baranca hopi grandi. Aruba mester ta den bo curason pa semper. Sigi bishita boso Dera Gai, Dande Festival y ArubaDag, paso ta di nos e ta!! Arubiano bo ta……….demostre.

Un bes mas…..Danki mi amigo Roy pa e entrevista y bo esfuerso pa sigi informa y hasi esaki posibel pa tur nos Arubiano nan aki na Hulanda. Bo ta un ehempel pa nos aki cu ta bibando ja pa basta aña aki na Hulanda. Y cu Dios sigi Bendishonabo den tur loke bo  ta hasi pa nos Pais Aruba nos Dushi Tera e Baranca tan stima!

Un abrazo fuerte…..

Bo amigo y sirbidor Anthony Giel