Guillfred Besaril a nace na Aruba riba 9 di Januari 1974. Su persona ta di districto di Savaneta.
Señor Besaril, danki pa e oportunidad di por hiba un combersashon cu bo persona. Despues di MAVO via John Wesley College y HAVO na Colegio Arubano, bo a dicidi di drenta nos Cuerpo Policial. Kiko a motiva bo persona pa bira Polis?
~ Sinceramente, nunca mi no a pensa na bira Polis. Nos tabata un grupo di 4 amigo na Colegio y un di nos tabata kier bai Hulanda pa studia pa Inspector di Polis. Pero prome e kier a hasi e estudio na Aruba mes pa e por experiencia pa su mes kiko e trabou ta encera y si di berdad e kier bai Hulanda pa hasi e estudio aki. E no tabata kier a bai hasi e testnan su so y como bon amigo nos a dicidi na compañe. Ironia di bida, fin di November 1993, mi a ricibi un yamada di señor Pedro “Shon Pe” Krozendijk pa presenta na Warda di Playa diaranson 1 di December 1993. Mi a cuminsa na December pa un luna den departamento di Rijbewijzen di Cuerpo Policial y dia 4 di Januari 1994 mi a inicia cu e estudio pa Agente Policial. Ami, e unico di e 4 amigonan. Bida por ta masha straño, pero esaki tabata mi destino.
Kiko bo por conta nos di bo experiencia den nos Cuerpo Policial?
~ Semper lo mi ta gradecido na e organisacion policial Arubano. E la brinda un oportunidad bunita na desaroya mi mes riba diferente tereno. Di Polis uniforma, Recherche te na Lider Sindical. E organisacion ta uno dinamico y multifacetico. E no ta ambito facil pa labora aden, paso banda di ta traha na combati criminalidad, cuerpo policial ta un organisacion di mas di 500 agente policial pues mas di 500 individuo cu opinion propio. “All-in-All” un bunita experiencia cu a preparami ampliamente pa e retonan cu mi por encontra den mi funciona actual.
Na aña 1999 bo a bin Hulanda pa sigui bo estudio den Opleidingskunde (Bachelor in Training & Human Development). Kiko ta e motibo cu bo a dicidi di segui e studio aki?
~ Na December di 1998 mi a solicita pa e funcion di director di Academia Policial Arubano. E posicion tabata habri di for di 1997 y niun hende no a solicita pa e funcion. Mi a mira esaki como un oportunidad pa studia y amplia mi conocimento pa despues sigui duna mi contribucion den e parti formacion di mi coleganan di Cuerpo Policial. E parti aki nunca a materialisa pa motibo cu na 2001 a ehecuta un reorganisacion den cual a elimina e funcion di director mane cu e tabata na momento cu mi a solicita pe y na su luga a bin un funcion nobo di Enseñansa y Innovacion na un nivel academico.
Di aña 2009 te cu 2013 bo tabata e presidente di Sindicato di Polis Arubano. Kiko bo por conta nos di e tempo nan ey?
~ Despues cu mi a regresa di Hulanda mi a ripara cu danki na e reorganisacion di 2001 no solamente mi persona sino varios colega a sali menos privilegia cu otronan. promocionnan diripente a bira “Ahuste” pa uno si, pero pa e otro e la keda “promocion” conforme e sistema bieuw. Pues e periodo di 2001 pa 2006 lo bai den historia di nos Cuerpo Policial como e periodo “di Midi cu 2 Midi”. Mi ta un hende husto, cu semper a aplica e regla cu si algo ta conta pa un, pues e ta conta pa tur! Mi a lucha y uza tur posibilidad huridico pero na final a realisa cu si bo no ta uni, bo no tin forsa. Cu e pensamento aki mi a pone mi disponibel pa lidera e Sindicato pa Polis cu na 2011 a logra formalisa e reorganisacion cu a cuminsa na 2001. No ta tur hende a recupera loke a bai perdi den 10 aña, pero mi ta satisfecho como profesional cu tambe a sinti e mal ehecucion di e reorganisacion aki (te den cuero), cu nos a logra e mihor pakete posibel pa un y tur.
Despues di presidente di Sindicato di Polis Arubano bo a dicidi na aña 2013 di bai den politica na Aruba. Kiko ta e motibo pa drenta politica y pa kiko Movimiento Electoral di Pueblo (MEP)?
~ Mescos cu mi carrera policial, nunca mi no a pensa cu lo mi nifica algo den Politica Arubano. Pero mi esfuerzonan como lider sindical den polis a pone mi realisa cu no ta solamente den Cuerpo Policial tin un desigualdad. Aparato gubernamental Arubano y mercado laboral general no a conoce e adelantonan necesario pa por enfrenta e retonan profesional di actualidad y di futuro. Ademas mi tabata di humilde opinion cu e aparato hudicial en general tabata wordo maneha mucho for di theoria y/of for di un oficina. Cu un falta grandi di e practica. Pa esnan cu ta bisti un uniform pa bai un trabou, tin un realidad cu nan mester deal cune, dia aden dia afo. Un realidad cu buki so no ta yudabo cune. Na mes momento cu tin un theoria tin un realidad di caya cu ta grita bo! Y ta e aspecto aki mi a sinti cu nos gobernantenan ta falta hopi na dje; E experiencia di caya pa e ley y reglaran (theoria) bira realmente un respuesta riba e necesidad di prevencion, combatimento y rehabilitacion den ambito hudicial y cu tanto Pueblo ta sclama p’e.
~ Dicon Movimiento Electoral di Pueblo? Simpel; un líder sindical ta un social democrata y enbista di e cambionan di cara den e partido, mi a considere un tremendo momento como hoben profesional, pa drena e partido social democrata y duna mi aporte y sigui sirbí mi pais travez di Politica.
Señor Besaril ariba 20 di november 2017 bo a bira Minister Plenipotenciario na Den Haag. Kiko bo por conta nos di e funcion aki?
~ Despues di e resultado di 2017, una bez cu MEP a drenta coalicion cu POR y RED pa Goberna Pais Aruba pa e proximo 4 aña nan, mi a fiha como meta personal na demostra na comunidad Arubano cu mi tin e capacidad na carga responsabilidad. E funcion di Minister na Den Haag a duna mi e oportunidad aki y mucho mas enbista di loke nos a pasa aden como Gobierno recientemente a raiz di e Pandemia cu a manifesta su mes na 2020.
Na cuminsamento di aña 2020 COVID-19 a bati na nos porta. Kiko ta bo experencia cu e virus aki y kiko ela nifica pa Arubahuis?
~ “Corona” ta un pandemia cu a pone no solamente Aruba, sino full mundo na rudia. Economianan e keda destrui y hogarnan a pasa y keto bai ta den hopi dolor a consecuencia di e virus aki. Nos manera di funciona como organisacion no tabata esun di mas optimal. Arubahuis a keda pega den tempo y for di e prome instante cu mi a asumi e responsabilidad como Minister na Hulanda, mi a hasi mi maximo esfuerzo pa trece e cambionan necsario pa duna e empleadonan di Arubahuis e lugar cu nan merece. Paso laga mi ta enfatico; e no ta nada facil pa sirbi bo Pais leu for di cas, leu for di famia y bo sernan keri! Si no tabata pa e pandemia nos lo a cuminsa funciona for di aña pasa conforme un structura nobo. Un structura mas adapta na e era di informacion den cual nos ta biba aden. Pero “No hay mal que por bien no venga”. Pa motibo di e ultimo desaroyonan, entre nan e binimento di entidad COHO por ehempel, e tardansa a ayuda nos na identifica algun sector mas den e organisacion cu mester wordo fortifica. Awe mi por bisa cu e pandemia a pone nos den un posicion di “Adapt or Die Trying” (adapta of perece) como Pais. E realidad di awendia no ta mescos cu e periodo “Pre-COVID” y nos mester uza e momento aki pa reinventa nos mes pa Aruba, no solamente Arubahuis, por sali un biaha mas padilanti.
Kiko ta bo deseonan pa nos Aubianonan aki na Hulanda, Aruba y na mundo pa e aña aki?
~ Mi lo zona poco mane un Dande, pero mi deseo di mas grandi ta pa nos stima otro mas como ruman. Den e Periodo “Post-COVID” nos mester uni pa por hiba nos Pais un biaha mas padilanti. Sea cu bo ta na Hulanda, Europa of na caulkier parti di Mundo, awor ta e ora pa bolbe bek cas pa hunto nos reconstrui nos Dushi Isla. Y awendia bo presencia no mester exclusivamente físico. Bo por tambe di forma virtual, atravez di diferente plataforma cibernetico, basta bo tin e disponibilidad pa duna Aruba un man. E caminda pa recuperacion, no ta tarea so di un Gobierno. E ta e destino di un Pais, su hendenan of esnan cu ta stime. P’esey mi ta termina e entrevista deseando tur Rubiano y esnan cu ta stima nos Dushi Isla, hopi amor y salud paso esakinan ta pilarnan riba cual nos lo bolle reconstrui nos Pais Aruba.
Señor Besaril, danki pa e oportunidad pa combersa cu bo. Ami, Roy Kelly di website Arubiano ta desea abo i bo famia un feliz aña 2021 cu hopi bendicion y salud.