Aruba y su Nomber
For di dia cu e Spañonan, Alonso de Ojeda
y su compañeronan, a yega Aruba na aña
1499, hopi 
escritor a skirbi tocante Aruba y hopi a trata di descubri con e isla a haya su nomber. Diferente
nomber relaciona cu Aruba a wordo usa pa escritornan, pero cu tempo varios a wordo descarta. Por ehempel: Oro Hubo (tin oro). E palabranan ey nunca por a wordo usa pa e Spañonan pa motibo cu dia nan a yega nan no a descubri algo di balor manera oro of
plata y pa motibo cu no tabatin nada pa nan uso, nan a yama e isla “Isla Inutil”. Nos tur sa
cu oro a wordo decubri na Rooi Fluit door di e hoben Willem Rasmijn.
Pa haya sa e origin di e nomber Aruba, nos mester busca profundamente den e historia di e Indjannan na e costa di Venezuela, prome cu e Spañonan a yega, pa mira di con e Indjannan a papia tocante “Isla di Arua”.
Ora studia di con Aruba tabata pobla cu e mesun rasa di Indjan cu a biba na Venezuela, nos ta haya den e Museo Arkeologico di Aruba algun indicacion den forma di pintura di pochi y decoracionnan di aparatonan di piedra, casca di lama y ceramic di klei. E hendenan aki tabata e Caiquetionan di e confederacion di Arawak na Paraguana y rond di Coro, Falcon.
Sr. Walter Raleigh a skirbi cu e confederacion di Arawak, tabata un di e mas importancia di e confederacion di Sur America. Perteneciendo na e confedeacion aki, un tribu di Caiquetio a biba den e costa noordoost di Venezuela. Nan tabata bon piscado, guerero y cunukero pero tambe bon minero.
Tambe Mario Bricento Yragorri, un historiado den asuntonan di Indjan, a skirbi den “Historia di Venezuela” cu e nombernan di e paisnan y luganan di e Mundo Nobo, tabata existi caba y nan no a wordo duna pa e Spañonan America, ta bin di e palabra Americopana, cu tabata e nomber di e nacion di mas grandi di e Ijdjannan di Sur America, y no a wordo duna na honor di e explorado grandi (aventurero) Amerigo Vespucci, kende a acompaña e descrubido, Christopher Columbus, na varios ocasion. Den e nacion Americopana, bo por haya e confederacion di Arawak of Naruak, kendenan a biba den e Provencia di Curiana (Venezuela y Brazil), cu capital: Xorio of Choro, awendia Coro. Tabata e Indjannan ey di un tribu di confederacion aki, cu a crusa e lama y establece nan mes riba e isla y a duna e nomber di “Isla di Aruba”. E resto di e tribu a sucumbi y a move pa biba na e margin di Lago di Maracaibo. Ainda nan tin e nomber di Arubaes.
Hopi aña pasa, prome cu e Indjannan legitimo a establece completamente na e Peninsula di Paraguana, a bin algun di e tribu aki, kendenan tabata biba na e rand di e boca di riu di Aroa, na Falcon, Venezuela.
E Indjannan tabata cansa di e atake constante di e Indjannan Caribe y pa evita esaki, nan a move pa Paraguana. E Caribenan a persisti den persigiui nan y atrobe despues di varios atake, hopi di nan a bin e isla di Aruba, unda varios miembro di e tribu ya tabata biba den pas y harmonia. E grupo cu a move pa Aruba a wordo dirigi pa e Cacique cu a descubri e isla, Cacique Arua. Pesey nan tabata papia di: Isla di Aruba.
Cacique Arua a nace na Boca di Arua, Estado Falcon, Venezuela den e aña 50 A.D. Su casa Shira a muri durante parto y a laga atras nan unico yiu cu a nace den e aña 70 A.D. El a haya e number di Coribori, cu nan a bisa cu nifica Pastoor Chikito di Coro. Tin un storia largo unda Cacique Aruba, su yiu Coribori y 10 guerero tabata bay Cujarao (Corsou) y Bonaite (Boneiro) pa busca salo. Tambe nan a bay pisca un dia basta leu di costa, y durante un tempestad nan a bin te na e isla di Aruba, sin cu nan tabata sa unda nan tabata. Arua a manda su yiu y cuatro guereo pa bay busca un cuidad y busca informacion, pa sa unda nan ta. Asina Coribori y e guereronan a sigui cana den mondi te cu scuridad a yega y nan a dicidi di subi Orcuyo of Pan Dushi cu awe ta Hooiberg pa tin un miho bista riba e isla. Un candela nan a mira pero e tabata di Arua y e otro guereronan cu a keda atras. Despues di varios dia, nan a dicidi di rema bek pa nan tribu, pero prome cu esey Coribori a bisa: “Pa Arua, bo a descubri un isla”.
For di un distancia nan a reconoce na campamento. Cu alegria y entusiasmo nan a rema pa dos dia largo, pero porfin nan a mira unda nan tabata biba. Varios canoa chikito a bay topa cu nan. E famianan na Boca di Aroa tabata contento. Cada un di nan a kere cu algo serio a pasa nan, pasobra nan a keda hopi largo e biaha aki y hasta nan a pensa cu nan lo no bolbe mas. Te hasta nan a pensa cu nan a muri di hamber of sed of a hoga.
Manera nos tur sa, e prome habitantenan di nos isla tabata Indjan y Spañonan. Si nos lesa e storia di cada uno, ami ta casi convenci cu e nomber Aruba a bin for di e Indjannan, esta Arua. Si nos compara cu e Spañonan, cu a referi na Oro Hubo (tin oro), nan no a descubri algo di balor manera oro of plata, pesey tambe nan a declara “Isla Inutil”.
Si tin un persona cu lo por contraduci mi pensamento, lo mi aprecia pasobra asina nos tur por siña di otro. Pero mas importante ta, cu nos mester laga documentarionan corecto pa e futuro generacion, esey ta mi meta.
MetaData: Fuente: Adolf Kock Editor: Adolf (dufi) Kock Aña: 2015 Coleccion: n/a Genero: Historia Decada: Historia