Paula bon dia. Di e manera aki mi kier a gradicibo pa bo tempo. Mi ta wak bo ariba Facebook i bo ta mustrami un persona cu ta hasi hopi cos pa nos Arubianonan na Aruba. Conta nos algo di bo persona.
Mi tin un experiencia amplio den e mundo di entretenimiento, den deporte, musica y baile y esaki for di un edad basta hoben. Mi ta un Maestra di Ceremonia desde 1993, esaki mi a cuminsa eherce na La Cabana Beach Resort, y mi mentor tabata nos Primerisima Sharon Rose, ‘danki Sharon pa e pone e microphone den mi man y lagami entretene e guestnan’. Mi a sigi cu e trabao di MC y asina na 1994 mi a para MC pa varios show na Tamarijn y Divi Resorts unda te awe mi ta MC, danki Octavio Hodge y Francis Ridderstap pa e confiansa y lealtad. Den pasado mi a traha den radio division, entre otro na radio stacion Mi Fm, radio stacion Kiss Fm y radio stacion Magic FM y esun cu a introducimi na e mundo di radio division ta Sr. Ivan Kelie Jr, Ivan semper a kere den mi potencial y den mi voz, ‘danki Ivan’. Mi ta para MC no solamente pa eventonan pa shownan turistico, pero tambe pa eventonan pa shownan local. Tambe mi ta organisa y promove diferente eventonan y desde 2015 mi ta sumamente activo den e mundo di steelpan na Aruba, trahando cu Nico Connor y Lee Connor yuinan di e legendario, e pionero den mundo di steelpan na Aruba e fayecido Sr. Edgar Connor.
Lee Connor ta director di Aruba Panman Foundation y Nico Connor ta director di Sweet Pan Music, y conhuntamente nos ta traha pa mantene e musica di steelpan bibo aki na Aruba y crea plataforma pa e generacion actual y e generacion nobo. Sweet Pan Music tin dos evento annual dedica na Sr. Edgar Connor cu ta celebracionan musical naturalmente pa laga e musica di steelpan resona y tambe duna reconocimento na esnan cu ta contribui na e mundo di steelpan na Aruba. Nos tin un ‘theme night’ 
un show bunita na hotel cu jama ‘A Touch of Aruba’ unda Nico Connor ta toca y N.L.G. dancers ta baila su cancionnan bunita di Aruba, un show cultural, folklorico, cu local y turistanan ta encanta.Tur esaki a cuminsa ora mi tabata wak videoclips di Nico Connor na Tele Aruba y mi a keda encanta cu su musica tocando cancionnan di Aruba y bailarinan ta baila riba su musica, y den 2015 a presenta un oportunidad pa mi produci un show nobo pa hotel, y mi no a pense dos bez, mi a acerca Nico Connor y a busca un grupo di baile y ami mes como host di e show. Nos a duna e show e nomber di ‘A Touch of Aruba’ y e show aki ta super exitoso, nos a presente un parti di dje na Hulanda durante celebracion di Arubadag na 2018 y e luna aki nos ta riba un barco crusero ‘Azamara Journey’ pa duna dos presentacion na mas di 500 turista, y nos ta spera di dentro poco, bishita Korsou y Boneiro tambe pa presenta nos show cultural.
Mi a produci y ta host Mini Disco show pa muchanan cu ta bin vakantie cu nan mayornan y ta keda na Tamarijn y Divi Resort. Mi mes ta kies e musica, traha e choreografia baila y para MC pa e show aki. Nos ta un team di 4, mi tin 3 cheerdancers ta compañami den e show aki.
Mi ta hopi activo mes, mi ta scirbi poesia, articulonan, y tambe den mi tempo liber mi ta practica rolschaatsen y mi ta hasi trabao voluntario, esey ta algo cu mi ta hasi hopi den e mundo di arte y cultura, asina mi ta coopera cu actividadnan di Fundacion Muchila Creativo (Fundacion cu ta traha riba e tereno cultural, educativo, artistico, creativo y terapeutico) unda mi ta para MC, dialoga, y scirbi articulo pa promove e fundacion su actividadnan. Mi ta traha choreografianan di baile duna training na muchanan di scol of pa fiestanan di hofdames y hofheren ya cu den pasado mi mes a forma parti di gruponan di baile y tambe tabata tin mi mes un grupo di baile, y esaki a keda un hobby te awe. Mi ta hasi voiceover pa propaganda na radio of pa video loops. E voz aki ta hasi su trabao tur caminda un tiki, mi ta agradecido na nos bon Dios pa e talento, pa e habilidad, pa mi voz y dominio di varios idioma pa asina por entretene nos localnan y nos bishitantenan.
Bo ta den un organisacion si ta asina con jama bo organisacion?
Mi ta hopi amplio den e mundo di entertainment y mi ta hasi esaki bou nomber di mi mes un entertainment cu ta My voice My creativity y ta traha conhuntamente cu Sweet Pan Music y Aruba Panman Foundation.
Pa locual bo ta hasi hopi biaha bo ta haya hende ta criticabo. Con bo persona ta anda cu critica, kiko bo ta bisa?
Tanten cu un critica ta constructivo, mi ta aprecia e critica y trata na mehora mi mes, pero ora un critica ta destructivo mi por bira defensivo y por duna mi opinion na un manera stret pero cu respet y toch tambe mi por keda sin reaciona pa no tin mal comprendemento. Nos tur ta diferente y hopi biaha no ta pensa mescos, y esaki por trese conflicto y mi ta prefera di aleha pa evita esaki.
Den e ultimo anañan bo a cambia of crece y cua calidad, habilidad bo a traha ariba dje.
Mi no a cambia mi ta e mes un Paula di semper, alegre,social, humanitario, di parti crecemento, sigur tur dia mi ta crece un tiki mas como un ser humano, den mi carera di MC, organisa evento, y scirbi, tur esey mi ta traha riba dje pa ta mihor cada dia.
Mi famia ta nifica un mundo pa mi, bo expresion ariba Facebook, splicami e palabranan aki.
Mi ta forma parti di un famia humilde jena cu amor y cu a enfrenta retonan dificil, y esaki a hasi nos fuerte y a uni nos mas y mas. Y e fact cu nos ta biba lew di otro ta hasi cu nos ta aprecia cada momento cu nos por comparti cu otro. Ful mi famia ta na Hulanda mi mayornan, rumannan y yuinan, pesey constantemente tin biahamento pa Hulanda pa por tin e calidad di tempo hunto, disfruta di otro tanten cu Dios duna nos bida.
Paula mi ta hopi contento di por a hasi e entrevista aki cu bo persona. Mi ta deseabo hopi exito den futuro. Mi ta deseabo un Bon Pasco i un Bon i Felis Aña 2020 cu hopi mas exito.