Facilidadnan Medico na Aruba

Adolf (Dufi) Kock

Dedica na e prome dos Dokternan na Aruba

Aruba 2021

FACILIDADNAN MEDICO NA ARUBA

Aruba actualmente tin cuatro centro medico situa den diferente bario: Hospital Dr. Horacio Oduber na Boulevard No. 1; Centro Medico Rudi Engelbrecht na San Nicolas; Urgent Clinic Care Noord 63; Noord, y Medcare Clinic na J.E. Irausquin Blvd 330 na Noord. Pero den historia di Aruba ta menciona algun hospital chikito, por ehempel:

Na aña 1829 Aruba tabatin un hospital chikito cu a duna servicio medico y recuperacio na, entre otro, dos ingeniero/minero Aleman, Srs. Pfiffer y Schumacher. Segun un raport esaki tabata na cuminsamento di e tempo di mina di oro.

Na aña 1870, un hospital chikito a wordo lanta na Cunuco Abou door di iniciativa di Gezaghebber Ferguson. Algun hende di Europa a wordo trata, incluiendo algun cu keintura geel. Un hospital chikito di 30 pia largo y 12 pia hancho.

Na aña 1900 otro hospital a wordo estableci den un cas bieu perteneciendo na heredero di Guillermo Oduber. Un cas tipico Arubano cu a wordo cumpra pa Antilliaanse Bank pa rapido traha luga pa un edificio moderno. Esaki tabata pega cu misa protestant na Playa enfrente di e prome dokter di Aruba, Sr. Horacio E. Oduber, kende tabata e unico dokter riba e isla, cu establecemento di e hospital aki, Patras di e cas tabata biba Ma Marta (Marta Angela) y su yiunan, kende a duna hopi cooperacion na e dokter y a traha como su asistente y alabes como un partera.. E hospital tabata keda entre e crusada di Wilhelminastraat y Rifstraat.

Door cu dinamita tabata hopi usa den e mina di oro, por ehempel na Calbas, Miralamar, Cadushi, etc. y no tabata practica mucho seguridad, tabatin varios accidente. Si tabata un accidetne leve, e pashent ta wordo treci na hospital riba un burico; accidentenan grave, e pashent ta wordo treci via un wagon habri door di mula, pa e trahadonan. Hopi biaha e persona accidenta ta mas morto cu bibo. E potret ta musta Dr. George Hopkins y su señora Lucy.

Dokter Horacio Eulogio Oduber, nos prome dokter na Aruba, a nace na Puerto Cumarebo, Estado Falcon, Venezuela, dia 18 di januari 1863. Yiu di mayornan Arubano, Francisco Oduber Emmonet, naci na aña 1827 y Johanna Prudencia Eckmeyer-de Cuba, naci na aña 1827. Francisco ta muri na 1892 y Johanna ta muri na aña 1888. Dr. Oduber ta casa cu Antonia Cristina Penso-Leyba, naci na Cumarebo na 1864. Di e matrimonio aki a nace dos yiu homber, Francisco Oduber naci na aña 1884 y Jacobo (Cobito) Oduber na aña 1893. Francisco ta casa cu Carmen Constanza v/d Biest, naci na Venezuela na aña 1890. Francisco y Jacobo tur dos tambe tabata dokter. Francisco inicialmente a traha como dokter na Cumarebo y despues na Aruba. Jacobo a traha na Aruba mes. Dia 16 di october 1935, Dr. Horacio Oduber ta muri na Corsou. Su casa, Antonia a muri na Aruba na 1911. E dos yiunan ta muri na Aruba,, Francisco na aña 1960 y Jacobo na aña 1961.

Historia ta conta cu Dr. Horacio Oduber tabata core riba su cabay pa bay consulta cu su pashentnan. Na su cas, Quinta del Carmen, e tabata haci operacionnan. Un caso hopi tristo tabata esun di Sintiago Henriquez cu tabata traha na Phosphate Maatschappij. Un mainta el a conta su coleganan di trabou cu el a soña cu e mina di fosfaat a basha abou y tap’e completo. Tur a hari’e, pero esaki a pasa riba e mesun dia. Ora cu nan a sak’e, su situacion tabata critico. Nan a hib’e Playa den un boto, pero desafortunadadamente tabata net e dia cu dokter tabatin su consulto na Savaneta. Mesora nan a bolbe pa Savaneta, pero el a muri prome cu nan a yega.

Despues di dies aña di trabou duro a pone cu Dr. Horacio Oduber dicidi di tuma un vacacion. Na su luga a bin Dr. C. Zeppenveldt cu no tabata un Ciruhano. Dia cu un di e trahadonan di e mina di oro a herida su man den un di e mashinnan, e dokter a bisa cu amputacion por trece e solucion, pero e no por haci esaki.

E director di e maatschappij, Sr. Farmer, kende na Australia a yega di duna prome auxilio, a bisa cu mester tuma e risico cu Sr. Gabriel Ruiz, e accidenta, sino e no ta scapa. Narcotico no tabata conoci. E pashent a wordo treci bou influencia di alcohol, y cu e asistencia di e dokter, Sr. Farmer a haci e amputacion. E pashent a surpasa e operacion trankilmente y despues di cuarenta aña a muri un morto natural. Paz na su restonan.

Na aña 1903, Dokter George Richard Hopkins a cera un contract cu gobierno Hulandes pa bin traha na Aruba. El a bin como un oculista (dokter di wowo) y tabata bin duna consulta na Savaneta na 1909. Pa straño cu por zona, pero ta masha hopi yiu a nace na su man. Den un cuarto di Shon Betchi y un casita di torto di Cai Wolter e tabata tene su colsultonan na Savaneta. 

Dokter Hopkins den aña 1912, den un espacio chikito tabatin un hospital na Madiki cu e dokter tabata duna servicio. E por a duna servicio medico na mas o menos diesseis pashent. Un tal Doloria tabata e nurse. E hospital tabata principalmente destina pa duna servicio medico na esnan cu tabata biba hopi leu. Esaki tabata fuera di e servicio medico cu e tabata duna na Savaneta riba cierto dia, biniendo den su auto Metz, e prome auto di Aruba cu el a trece.

Na aña 1913 Gezaghebber H. J. Beaujon a habri un hospital entre e scol publico den e huki di V. G. Emanstraat /Miraflorweg na Playa cu un capacidad di 13 cama. E hospital aki tabata keda na un distancia di e water toren.  

Hospital San Pedro di Verona:

Oficialmente e prome hospital di Aruba tabata San Pedro di Verona den caya na Playa, na aña 1920, estableci pa e seournan Dominicanessen cu a cuminsa cu cuido di enfermonan den un cas na Sividivi. Un mainta tempran di dia 1 di october 1920, Soeurnan Clara y Mathia ta yega y saluda cu yen di emocion door di nan curashi y dedicacion. Nan tabata seournan Dominicanessen y esaki tabata nan prome dia na encargo di e prome hospital oficial di Aruba. E edificio tabata hopi chikito y e seournan tabata sa cu apenas e por acomoda e necesidad di seournan na Aruba. Pero seour Clara y Mathia tabata sa tambe cu e tabata un comienso y cu tabata mucho mas miho cu pone pashentnan riba barco y manda nan pa tratamento na Corsou, cual tabata e custumber y e unico practica prome cu 1920.

E hospital di seournan tabatin cuatro kamber. E no tabata un edificio nobo y no tabata designa pa cuido di enfermo. Pa bisa berdad, e tabata un cas di oficial di e compania di mina di oro, un cas di cunuco y luga di biba pa e seournan Dominicanessen kende tabata docente. E hospital tabata un resultado di iniciativa di mgs. G. Vuylsteke y e dokter Mericano, Dr. George Richard Hopkins. A cuminsa na aña 1920 cu 20 cama, su cuatro kamber, uno pa hende homber, uno pa hende muhe, uno pa tratamento y e otro di biba pa dos seour. Den su existencia tabatin 230 cama, kamber di duna lus, kamber di operacion, cuido intensivo, radiologia, botica, y E.H.B.O. policlinica. El a wordo yama San Pedro di Verona y bendiciona pa Obispo M. G. Vuylsteke durante su dedicacion dia 29 di september 1920.                                                     

Hospital San Pedro tabata situa den e mesun area di Sividivi na Playa cu tabata pertenece na e hospital original. San Pedro nunca a move, el a sigui expande. E identificacion Sividivi ta atribui na Jose Ramon Recui. E palabra supuestamente ta un corupcion di Spaño sividigua, un mata referi na Aruba como seida. Sr. Recui tabata doño di e plantacion di Sividivi siglonan atras. El a bende cu Felipe Bareño, kende na 1901 a bende cu e Compania di Concesion di Oro di Aruba. Cobamento di oro e tempo ey no tabata rendabel y e compania di oro a bende su propiedad di Sividivi na Iglesia Catolico. Iglesia Catolico su compra na aña 1908 no tabata pa establece un hospital ey.

No tabata te diesdos aña despues cu e esfuerso di un dokter y autoridadnan mas halto di iglesia na Antiyas a yega na un termino, un cas a wordo converti den un hospital. Un curandera y un facilidad inadecua pa enfermeria unda tur e hendenan di Aruba mester a wordo atendi cu nan malesanan cincuenta aña pasa. E necesidad grandi pa tratamento medico apropia y recuperacion a urgi Dr. George R. Hopkins pa apela pa e desaroyo di un facilidad di hospital adecuado. Su esfuerso a atrae poco consideracion te ora cu el a acerca Obispo M. Vuylsteke, dia 23 di mei 1919, cu a haci cu e obispo a tuma e decision pa trece un hospital na Aruba. Obispo Vuylsteke ta tambe credita pa duna e hospital su nomber, e significacion di cual, sinembrago, a wordo perdi cu tempo.

Cu e iglesia catolico na Aruba dunando e curashi, a wordo anuncia cu e cas di cunuco, riba e propiedad di Sividivi lo wordo converti den un hospital. E seournan Dominicanessen cu tabata biba den e cas, mester construi acomodacion otro caminda pa nan. Un coleccion di fondo a wordo organisa pa yuda cubri e costo pa renoba e cas den kambernan adecua. E hospital a wordo prepara y inaugura dia 29 di september 1920. Seournan Clara y Mathia a tuma e prome cuatro pashentnan dos dia despues. 

Manera anticipa, e hospital tabata mucho chikito pa complace cu e necesidad di e pueblo. Unabes cu e hospital a habri, seour Clara y Mathia a ofrece nan kamber na pashentnan. Kambernan adicional a wordo construi na ambos banda di e cas di cunuco. Hospital San Pedro, inmediatamente ora el a cuminsa, a cuminsa expande. Nunca a stop tampoco. E aña ey e hospital tabata meimei di su proyecto di edificio di mas ambiciona. Di acuerdo cu e director energico y acomoda di hospital, Reverendo C. Spekle, tur cos ta wordo expande.

E hospital actualmente tin 198 cama, mas cu dobel di loke e tabatin dos aña anterior. Na cuminsamento di aña 1963, coincidente cu e terminacion di tur e proyecto di edificionan di hospital, lo tin 260 cama. E seccion di mucha a haya prome consideracion pa motibo di e cantidad di mucha cu mester atencion medico a surpasa e cantidad di facilidadnan. E seccion pediatrico a wordo habri na februari. E contruccion nobo, renobacion y modificacion di e structura existente ta asina extento cu a inclui e entrada principal di e hospital. Manera e ta, e entrada principal di e hospital ta na e parti zuid di e area di Sividivi. Cu e terminacion di tur construccion di 1963, un entrada principal, entrada vehiculo y espacio pa parkeer lo ta na e parti nort di e area di e hospital. 

E crecemento di e hospital tabata constant durante e añanan. E necesidad semper tabata evidente, y e seournan Dominicanessen a haci tur loke nan tabata por pa encurasha e crecemento di nan hospital. Nan, pa bisa berdad, tabata asina exitoso, cu nan a traha sacando nan mes for di hospital, Na aña 1940, e kamber di x-ray a habri y na 1942 un adicion grandi a wordo inclui pa hospitalisa aliadonan. Na 1945 Hospital San Pedro tabatin ochenta cama, pa 1957 e camanan a wordo aumenta pa 115. Tabata e tempo aki cu e enfermeria Dominicanessen bou di e seournan no por a ofrece personal mas cu e demanda grandi di e hospital creciente. Despues di trintiseis aña dedica na construiendo un bunita hospital cu mester a cuminsa cu un edificio di cuatro kamber. E seournan Dominicanessen a laga San Pedro. Nan a wordo reemplasa pa seournan Franciscano di Asten. 

Na aña 1957 e staf di Hospital San Pedro tabata consisti di bintitres seour Franciscanco cu a tuma over kende nan funcion tabata pa mantene na ordo y eficiencia. Nan tabata wordo asisti pa diescuatro nurse Hulandes, tres nurse Arubano, un nurse Hulandes masculino, cincuenta asistente y tres mucha muhe. Tabatin 90 pashent den e hospital. Den curso di añanan cu poblacion a crece, necesidad pa extende e hospital tabata bira mas urgente y nan a aumenta e camanan ta na 220. Dia 29 di december 1960, fundacion Ziekenverpleging a lanta y obispo a keda presidente y Dr. Nuboer a bira e director general. E hospital a keda existi te november 1976 ora cu hospital Horacio Oduber a habri cu 270 kamber.

Mester menciona cu ora hospital San Pedro a sera, Michael Paviljoen a tuma over a edificio cu for di aña 1958 e tabata hospeda 30 anciano. Na aña 1976 e tabata cay bou di fundacion Ziekenpleging Aruba. Ora cu hospital a move pa Eagle, Michael Paviljoen a keda. Tanto e paviljoen y Mari Stella a keda di Stichting Bejaardenzorg Aruba (SABA).

Hospital San Pedro a tuma un funcion nobo y uno importante pa e hendenan di Aruba. Nan a cuminsa organisa cursonan pa atrae mas nurse. E curso di tres aña pa nurse na hospital di Playa a wordo oficialmente reconoci pa Hulanda. Hospital San Pedro ta autorisa pa entrena y gradua nursenan reconoci. Diesocho nurse studiante lo a cuminsa e entrenamento aki dia 1 di januari 1961.

Hospital San Pedro a desaroya tremendamente den cuarenta aña. El a subi constantemente for di un cas di cunuco pa un hospital cu anualmente ta atende miles di pashent. Seour Carla y Mathia tabatin rason di saluda e mainta di dia 1 di october 1920 cu emocion. Di nan un empresa responsabel. Probablemente nan a sospecha of resa pa e comienso cu nan a duna e hospital di cuatro kamber. San Pedro di Verona, lo permiti pa e crece na e proporcionnan magistral cu e ta awe y lo ta mas ainda, mañan.

Hospital San Pedro di Verona – Renobacion:  

Na aña 1953, ora bo haci un bishita na Hospital San Pedro na Playa, e prome impresion cu aparentemente lo bo haya ta un trankilidad inmenso. Edificionan nobo recientemente completa y otro bou construccion ta traha rond di un patio hancho cual ta pone tur e edificio dentro di algun stap den e centro di e hospital. Tur e claridad di solo cu ta penetra den e patio ta cay riba matanan berde y ta briya riba e edificionan cu un calor agradabel cu ta wordo alivia door di e brisa suave cu ta pasa riba e edificionan. Hunto cu e atmosfera di trankilidad ta reina tambe un aire di eficiencia. 

Caminda di concreto ta conecta e edificionan cu otro, eliminando uso di trapi. E cushina briyante cu bon ventilacion ta un modelo di eficiencia moderno, for di e forno di staal puro te na e mixmaster grandioso y e particionnan di blokki di glas cu ta separa un departamento di cushina for di otro sin stroba claridad.

Esaki ta un hospital di convento y religion nunca no ta keda leu. Henter dia e seournan ta haci bishita cortico den e kapel pa resa y medita. E kapel cu ta keda net den centro di e terenonan di e hospital, ta generalmente dorna cu flor fresco y su portanan ta semper habri. E hospital cu ta pertenece na Vicariato ta wordo opera door di seournan di orden di San Dominicanessen. Superintendente di e hospital ta Seour Candida, un seour chikito simpatica di mas o menos 60 aña. Ademas di su otro debernan, e ta Moeder Vicaria di tur seournan di Orden San Dominicanessen den Antiyas Hulandes. Si bo combersa cune, no ta dura mucho prome cu lo bo compronde cu mientras e ta mira construccion progresa riba e hospital, e ta contemplando e futuro, ora hospital lo por haci mas y mas pa mehora salud di hendenan di Aruba.

Hospital San Pedro – Unidad Di Cuido Intensivo:

Dia 29 di september 1970, cu Hospital San Pedro a cumpli su 50 aña di existencia, el a ricibi un regalo hopi costoso. Ta trata di un unidad di cuido intensivo, danki na tur esnan cu a contribui cu fondonan pa asina e hospital por a haya un aparato hopi importante pa scapa bida di nos hendenan. Loke e cooperacion entre organisacionnan y comunidad por logra a keda proba cu un regalo costoso pa e hospital.

Un diesdos organisacion di nos isla a uni forsa pa lanta un comision 50pa50, cu e meta pa colecta placa pa cumpra e unidad aki pa salba bida. Un di esnan cu a tuma e iniciativa pa e proyecto tabata Sr. Ike Cohen di Strand Hotel, kende a forma e grupo.

E organisacionnan cu a coopera cu e comision a inclui Asociacion di Maestronan (VLA); Club di Leones; Jaycees; Independent Oil Workers Union of Aruba (IOWUA); Sindicato di Ambenaarnan di Gobierno (ANAAB); Club Kiwanis: Club di Damas: Asociacion di Bankeronan; Camara di Comercio; Club Rotario; General Workers Union; Federacion di Trahadornan Arubano (FTA); Union di Trahadornan di Hotel; Asociacion di Hotelnan y Mariniernan Hulandes.

Tur organisacion a forma e comision di 50pa50, consistiendo di Sra. Polly Eriksen di Club di Damas como presidente, Sra. Isabel Loonstra com Vice-Presidente, Pablo Croes di Jaycees. Eloy Arends di Leones como Tesorero; Michael Kuiperi di Rotary pa publicidad y Alex Mansur di Kiwanis encarga cu Telethon.

E comision a cuminsa cu actividadnan na april 1970, y tabata tene reunion un bes pa siman. Den cinco luna nan a colecta un suma di Fls.42.,919.14 for di premionan di un cine – Fls.1,332.50 torneo knockout di futbol bou  direccion di Matheo Reyes di Lago su departamento electrico – Fls.1,301.95 un sterrit cu auto organisa door di mariniernan – Fls.58.35, y un telethon unda e comunidad di Aruba a contribui cu Fls.39,024.35.

Despues di a kita algun gasto menor di Fls.710.28 e comision dia 29 di september 1970 a presenta un check di Fls.42,206.76 na Mgr. Holterman, Presidente di Directiva di e hospital. E unidad pa cuido intensivo a wordo poni oficialmente na uso dia 5 di juni 1971 door di Gezaghebber Oscar S. Henriquez, nuebe luna despues cu e comision 50pa50 a cuminsa traha.

Cui gastonan adicional door di reconstruccion y instalacion cual hospital a paga, e cuarto di cuido intensivo a exigi un inversion total di mas cu Fls.50,000.00. Tur trabou adicional y instalacion di e unidad a wordo haci bou supervision di A. E. (Boy) Bergen, ingeniero hefe di hospital cu ayudo di su grupo di mantencion di 12 persona.

E unidad pa cuido intensivo ta haci posibel pa observa continuamente batimento di curason, sea pa mark’e riba un cinta di papel of mir’e proyecta riba un pantaya of un medidor. Tambe e tin instrumentonan pa yuda normalisa batimento di curason un defibratador y controlador.

E cuarto caminda e unidad ta, solamente tin tras di cama, pero e ta ekipa pa trata cinco pashent na mes tempo. E cuarto aire-condiciona tin e sigueinte instrumentnan: unidad pa condiciona señalnan na cada cama. Pa medionan di wayanan conecta na e pashent su brasa of pecho, e instrument aki ta “limpia” señalnan di curason pa asina manda señalnan condiciona pa un central pa observa nan. 2. Un console remote of stacion central, cu ta inclui: a) mashin cu por skirbi y por druk riba papel con un curason ta bati, continuamente of segun ta desea (electrocardiograms): b) cuatro anotador, riba cual hende por mira batimento di curason di cuatro persona na mes momento. E tin tambe un sistema di alarma den dje, cu por wordo ahusta pa indica ora cu e marca minimo of maximo wordo surpasa: c) Un pantaya riba cual por wordo observa con curacon di cuatro persona ta bati na mes momento. 3. Den delibrilador pa pols di coriente directo, cu por duna cuatro golpi ora curason ta bati iregularmente. 4. Un stimulador di curason portatil. E instrument aki ta ser usa pa stimula batimento di curason. E ta duna un metodo efectivo pa pone curason bati atrobe ora cu e para, door di duna impulso cortico di coriente. 5. Un instrumento combina mobil, cu ta contene un aparato pa skirbi directamente, un condicionador di señal, un medidor con curason ta bati, un pantaya observador, un stimulador di curason y un defibrilador pa pols. E ta un instrument completo cu por stimula curason sea di pafo of paden, continuamente y segun necesidad. Tambe e ta duna aviso cu hende por tende of mira ora tin cambio den batimento di curason. E ta duna tambe señal cu por wordo proyecta riba un pantaya, of por skirbi riba papel. 6. Unidad pa respiracion. Completo cu aparato cu ta saca huma for di aire y un spirometer. E unidad ta yuda e pashent cu tin dificultad pa hala rosea. 7. Sistemanan central pa duna oxigeno of pa vacuum. Actualmente e hospital no solamente tin ekipo di mas moderno pa percura pa pashentnan cu ta sufri di curason of otro casonan critico, pero e tin seis enfermero bon entrena pa atende nan. Dos verpleegster ta na warda pa dia. Un otro ayudante cu tey ora mester ta e Anestetista Ernesto de Kort. Nan ta sigui direccion di specialistanan medico.

Director medico di hospital, Dr. Frans Hage, tabata un consehero pa order e unidad y e tabata un di esnan cu a tuma iniciativa pa e proyecto. Pasobra e costo di operacion y mantencion di e cuarto pa cuido intensivo ta asina halto, cual ta Fls.100.00 pa dia.

Cu e instrumentnan Electrodyne nobo pa cuido intensivo y tambe empleadonan entrena, tur pashent envolvi e tempo ey tabata sigura pa ricibi e miho cuido cu ta posibel den cuarto di cuido intensivo di hospital San Pedro.     

 Na aña 1977, a converti e hospital aki den un cas pa anciano, door cu Dr. Horacio E. Oduber Hospital a bin cla y ta ricibi su prome pashentnan na e aña ey.

Como cu accidentenan tabata sosode cu frecuencia riba e barconan cu tabata frecuenta e refineria di Arend Petroleum Maatschappij na Eagle, un hospital amplio y un cas pa recuperacion tambe tabata necesario pa e empleadonan. Pa e motibo aki nan a adkeri Quinta del Carmen y e tereno di Bubali, cu e meta pa bin cu un hospital y centro di recuperacion. E cas tabata tey caba y e hospital a wordo traha parti patras y na october 1929 el a habri.  Quinta del Carmen a bira e cas di e dokter, pero mientras nan tabata trahando e hospital, e pashentnan a wordo trata eynan. Asina ta, bo tabata sinta den un di e prome hospitalnan di Aruba. Segun historia, Dr. Oduber tabata pasa riba su cabay, tene consulta. Tambe e tabata haci operacion, pero na su cas na Quinta del Camen. E hospital di Shell aki tabata masha poco conoci y cu e dokter Hulandes W. I. Harmsen cu a traha como un ciruhano tanto na hospital San Pedro y e hospital di Shell. 

E edificio monumental aki ta rico den nos historia. Esaki a cuminsa na aña 1916, ora e arkitecto famoso Adriaan Lacle a dicidi di traha un cas, estilo di cunucu pa pasa fin di siman of vacacion (esey e nomber ta para pe). E luga a haya e nomber di su yiu muhe, Maria del Carmen. 

Na aña 1953 cu e refineria di Eagle a sera, e hospital a wordo kibra y e material cu tabata sirbi, a wordo usa pa casnan di Help Elkander. Quinta del Carmen a wordo entrega na Dokter van der Kuip. A lo largo di tempo, Na fin di 2014, e mansion Arubano aki di 100 aña bieu, situa na Bubali 119, ta wordo renoba y converti den un restaurant pa e doño di Barefoot Grill Restaurant y a mantene e nomber di Quinta Del Carmen Restaurant. El a habri dia 24 di december 2014.

Hospital di Lago:

Na april 1929 un hospital a wordo habri na Lago, conoci como Lago Hospital, primordialmente pa su empleadonan, esnan di afo, y local y nan descendientenan. E tabatin un capacidad di 120 cama. Prome el a wordo traha den tankfarm den e refineria di Lago, pero despues cu tabatin necesidad pa mas espacio pa warda productonan (capacidad pa storage), a move e hospital pa e sero riba Punto Colorado. Mientras cu e trabou tabata andando na e hospital, a usa un bungalow den Colony como un hospital temporario. Mescos cu e dentista di Lago, Dr. Reeve tambe tabata usa un bungalow pa practica su trabou di dentista den Colony. Na aña 1960 a construi un hala mas na e hospital riba sero pa acomoda mas facilidad e empleadonan. Tambe e hospital tabatin un elevator, e unico den Lago Colony e tempo ey. Na aña 1970 el a wordo sera pa motibo cu e personal a wordo reduci for di 8,000 (1954) pa 1,500 (1970) empleado. E servicio medico pa e empleadonan y nan famianan por a sigui na hospital San Pedro na Playa. E hospital tabatin kamber di operacion, di duna lus, laboratorio, policlinica, farmacia, biblioteca, y a wordo opera pa dokternan Mericano y Hulandes, por ehempel internistanan J. D. Schendstok (1938) y B. Dalhuysen (1956-1973). Ora cu e hospital di Lago a sera, hospital Dr. Horacio E. Oduber a keda e unico hospital aki na Aruba. Despues cu desafortunadamente gobierno e tempo ey no a mustra interes pa tum’e over pa $1.00, Lago Hospital a wordo basha abou cu dinamita pa Joe Dynamite y su ekipo. . Un hospital cu tur su facilidad riba un sitio cu no tabatin mester ni airco pa motibo di e brisa fresco di lama.

Dr. Horacio Oduber Hospital: 

Na aña 1976 Dr. Horacio E. Oduber Hospital a keda funda pa un fundacion “sin fin lucrativo” Stichting Ziekenverpleging Aruba. Cu tempo e hospital aki a sigui crece y recientemente a haya un renobacion y adicion completo pa sigui sirbi mas di 120,000 habitante. Un hospital moderno cu tur facilidad y ekipo moderno cu por sigui brinda e servicio adecua. E unico hospital na Aruba cu 300 cama cu na aña 2004 a cuminsa cu un construccion y expansion grandi di su facilidadnan. 

Un renovacion reciente di e hala ta inclui un combinacion di un unidad di cuido intensivo, cuido mediano y unidad di cuido coronario, cual tin un capacidad flexibel di 12 cama. Un otro plan tabata pa renoba e edificio major y expande e hospital cu un hala di tres piso, cu lo sirbi pa tur servicio relaciona cu cuido pa mama y uno di pashentnan ambulatorio. 

 Un proyecto di expansion y renobacion grandi a cuminsa na september 2014 y cu mester termina pa september 2019. Ta ser bisa cu e lo ta e proyecto di construccion di mas grandi den historia di Aruba. E proyecto lo a inclui un departamento di emergencia, tres biaha mas grandi cu esun actual, un expansion di e salanan di operacion, unidad nobo di anestesia y construccion di un laboratorio di caterisacion cardiatico hibrido. Un edifico di seis piso lo lanta, cu lo keda separa fisicamente for di e actual toren di cinco piso. E 1000 metro cuadra di espacio nobo lo ofrece un clinica pa pashentnan ambulatorio, tres sala di hospitalisacion di trinta pashent cada uno, un centro pa “mama y yiu” cu lo tin un luga di parto, e sala pedriatico y sala di maternidad. E edificio bieu lo wordo renoba.

Dia 13 di april 2020, hospital a anuncia cu e capacidad di e unidad intensivo original di seis cama a wordo aumenta significamente a base di e resultado di e pandemia di coronavirus 2020 na Aruba. E hospital a aumenta su capacidad te na 21 caba, y despues di un cargamento di asistencianan medico, awo tin un total di 33 cama den cuido intensivo.     

Si bo no por wordo trata aki, e hospital ta ofrece cuido den exterior cu hospitalnan Mericano, Colombiano of Hulandes. E pashent lo viaha rapido cu air ambulance. Tambe e hospital ta ricibi pashentan di Boneiro pa tratamento avansa. E hospital tin hopi specialidad medico, mucho hopi pa menciona.

Aruba, geograficamente, ta wordo parti pa e brug di Spaans Lagoen den loke ta ser yama pariba y pabou di brug. Cu e unico hospital na e parti pabou di e isla y cu e crecemento di e poblacion, tabata necesario pa traha un centro medico na e parti pariba di e isla. Un otro motibo tabata cu e unico hospital situa na e parti pabou, e tabata resulta na un distancia hopi leu pa ora tin un emergencia na e parti pariba. Motibo pa cual cu mester a bin cu un centro medico na e parti pariba.

Diariamente diferente tipo di operacion ta tuma luga na Dr. Horacio Oduber Hospital cu e meta principal pa mehora e salud di cada pashent. Tin biaha cosnan extra special ta sosode den camber di operacion y e dia aki esey tabata e caso. Dr. Tim Peterson hunto cu Dr. Eric Vinck, tur dos ciruhano na hospital tabatin e mainta ey un operacion di pulmon y e biaha aki pa prome bes a haci uso di e tecnica yama “Single- Port Video-assisted Thorascopic Surgery”. Normalmente un operacion asina ta sosode cu tres corta chikito pero e biaha aki, manera e palabra mes ta indica, esta “single”, a haci’e cu un corta chikito so.

Dr. Peterson ta conta cu normalmente ta drenta den e thorax pa medio di mas corta chikito, cual ta resulta mas dolor pa e pashent ora e recupera. Awendia tin otro tipo di operacionnan inovativo, unda e meta principal ta pa purba haci e proceso di recuperacion menos dolor posibel.

Dr. Vinck ta conta cu normalmente ora di opera pulmon ta uza e tradicional corta mas grandi y esey ta haci cu e operacion ta dura mas di un ora largo. Door di a haci uzo di un corta mas chikito, esta e “Single port Vats”, e operacion a dura solamente cuarenta minuut. Beneficio di esaki ta menos dolor pa e pashent y tambe e por bay cas mas lihe, ya cu e tin corta chikito cu por cura mas lihe y e cicatriz ta menos. Visualmente, claro e ta hopi mas agradabel y por sigui mas rapido bek cu su bida.

Den e caso aki e operacion tabata uno pa asina por yega na un diagnostico. Nan a tuma un parti di e pulmon pa e specialista di pulmon haya informacion di e patologo pa nan por yega na un conclusion kiko e pashent tin y con ta bay trat’e.                         

Dr. Peterson a agrega cu e idea ta pa wanta pashent na Aruba pa no mester bay afo leu di famia. Aki poco dia Dr. Vinck ta bay cuminsa cu un specialisacion yama “cardiovasculaire chirurgie” na Medellin, Colombia y ora e termina e regresa Aruba. Den e cuadro ey, e ta ricibi guia di tanto Dr. Casper Lacle como Dr. Peterson.

“E idea ta pa hunto tur departmento di hospital sigui contribui cu inovacion. Tur ta practica formulanan nobo, uza tecnologia pa asina mehora servicio y calidad di tratamento pa e pashentnan. Den caso di cirugia, e idea ta pa haci e experiencia di e pashent hopi mas agradabel, haci nan estadia na hospital hopi mas cortico pa nan termina nan recuperacion na cas hunto cu nan famia”, Dr. Vinck a duna di conoce.

Dr. Horacio Oduber Hospital cu tratamento pa kibra verkalking den ader:

Recientemente na Dr. Horacio Oduber Hospital a trata dos pashent cu un tecnica nobo cu ta trata adernan cera cu hopi verkalking hacienda uzo di un balon. Anteriormente no por a trata nan na e HOH y pues tabata manda e pashent den exterior pa haci e operacion di curason.

 “Nos mester ta hopi orguyoso pasobra aki ta e prome centro di Caribe y tambe den Centro America pa cuminsa cu e tratamento aki. Dos pais den Latino America, esta Argentina y Chile, so a cuminsa cu e tecnica aki, pero tambe na Merca y Europa. A trata e dos pashentnan exitosamente cu e tecnica aki, Dr. Casper Lacle, Cardiologo a duna di conoce. Mi ta contento cu ambos caso a bay hopi bon y cu e pashentnan no mester bay afo, esta Colombia, pa opera, segun Dr. Lacle.

E tratamento inovativo aki pa nos isla ta grandi y ta di admira na unda ta haci uzo di un balon pa asina kibra e verkalking cu tin den ader. Na momento cu un ader tin hopi calcium, ta importante pa trata esaki prome cu pone un stent. E tecnica pa haci esaki ta uno hopi costoso, dificil y cu hopi riesgo di problema of operacion di bypass. Awo e tecnica aki ta haci uzo di mesun fisica cu niersteen vergruizing.

Loke ta haci’e bunita ta cu e ta kibra verkalking so, y no ta daña e ader mes. Por trata pashentnan cu “vernauwing” hopi cumplica na un manera relativamente facil cu casi cero (0) riesgo. E balon ta bastante costoso y ta comparabel cu e prijs di dos stent, Dr. Lacle a duna di conoce cu a papia cu AZV, kendenan a duna di conoce cu ta importante pa tin e tratamento aki na Aruba y nan lo cubri e gastonan aki.

Loke ta e parti bon di e tratamento aki ta cu e ta habri e ader cu tin “vernauwing” y por haci esey relativamente facil aki na Aruba mes. Pues e alternativa di cirugia di curason den exterior no ta uno necesario. Tambe loke ta haci’e atractivo ta cu e pashent ta keda un dia te cu un anochi den hospital y e siguiente dia e pashent por bay cas y e por ta na pia di trabou dos pa tres dia despues. Dr. Lacle ta contento cu e ekipo di hospital, uno cu ta super y ta dispuesto pa haci cosnan nobo pa por logra trata tur pashent na cas mes.

Tratamento di plasma afarese:

D’Mitri Queeley ta un hoben di St. Eustatius cu a bira malo mas o menos den luna mei 2021, y pa un motibo of otro e no por a cana mas. Pa e motibo aki e cu su mama a biaha pa St. Maarten pa ricibi cuido medico. Dies dia despues, dokternan a dicidi pa mand’e pa Aruba pa ricibi tratamento na Dr. Horacio Oduber Hospital. Awe su mama ta conta su storia y con un luna despues cu su yiu por para bek riba su pia, danki na e tratamento di plasma afarese cu el a ricibi.

Elaine Jeffrey, mama di D’Mitri a splica cu nan a bin Aruba riba conseho di dr. Choudhry, Na nan yegada e hoben no por a cana y tabatin hopi dolor y a base di testnan haci a conseha e tratamento di plasma afarese bou encargo di dr. Choudhry. E dia cu nan a yega di biaha a interna D’Mitri y e dia siguiente nan a cuminsa cu su tratamento.

Como un mama pa mira con su yiu tabata, ta kibra su curason. “D’Mitri a ricibi un total di shete session di tratamento di plasma afarese di cual despues di e prome caba tabata wak un adelanto paso e por a move su pia un tiki. Si esey a pasa den e prome tratamento, kiko bo por spera despues di shete tratamento? Esey a duna nos mas speransa”, Sra. Jeffrey a duna di conoce. 

Pa Sra. Jeffrey, dr. Choudhry tabata manda pa Dios cu e tratamento aki. E motibo ta cu e dokter a splica den detaye kiko tur D’Mitri lo experiencia na momento di tratamento. “E tabata cu nos constantemente. E tabata bin bisa nos di e tratamento, check D’Mitri, asina e mama a splica cu hopi alegria. E no sa si ta asina dr. Choudhry ta brinda servicio, pero si ta asina, e ta algo “awesome”.

Awo despues di shete tratamento D’Mitri por para su so. Awo e mundo di D’Mitri ta completamente diferente, y tin hopi speransa pa e bay bek na su bida normal door di e tratamento aki di plasma afarese. Sra. Jeffrey a duna di conoce cu nunca el a experiencia un tratamento manera cu el a ricibi na Dr. Horacio Oduber Hospital. E staff di nursenan, incluso e trahadonan di seguridad ta trata bo cu hopi amor y manera famia, el a bisa.

Hoben D’Mitri a duna di conoce cu ora el a yega Aruba, e tabatin hopi dolor y no por a haci hopi cos. Pero awo un luna despues ainda e tin mas pa bay. Te awo tur cos ta bayendo bon. “Mi kier gradici tur hende cu a atende mi. Cu a pone sinti bon”, el a bisa. Sra. Jeffrey por ultimo cu un alegria grandi riba su cara ta expresa: “Mi tin cu bisa danki. Aki ta caminda bo mester ta ora abo bira malo”. Ultimo palabranan prome cu nan a regresa St. Eustatius.

Dia 8 di maart 2021, Ministro di Salubridad oficialmente a habri e porta nobo di hospital cu ta duna aceso na diferente departamento. (Potret mas patras ta ilusta esaki.)

Centro Medico Dr. Rudi Engelbrecht:

Centro Medico Dr. Rudi Engelbrecht na Bernardstraat 75 a wordo construi na San Nicolas y destina como un post pa ambulance. El a ser nombra na e dokter cu a sirbi den e districto aki pa hopi aña. Na mei 1979, e contratista a termina e trabou, pero den un estado no completo. Debi na e crecemento y necesidad di cuido medico di e poblacion na parti pariba di brug, Dr. Cyril Zaandam riba su mesun iniciativa y fuera di e gobierno Hulandes a dicidi di bay Hulanda pa convence miembronan di Parlamento con importante e ta pa completa e proyecto. Despues di dos biaha pa Hulanda, Reina Juliana a dicidi di aproba e placa pa termina e proyeccto. Asina Centro Medico San Nicolas, asina papia, a bira ”un regalo pa e reina”. Cu e terminacion di e proyecto, el a wordo oficialmente habri dia 1 di jannuari 1982. E prome nurse cu a ser emplea tabata Sr. Jordano Croes. Sr. Felix Flanegin tabata Deputado di Salubridad e tempo ey. E tabata den operacion for di 1 di januari 1982 te dia 15 di september 2004. Nos no por keda sin menciona tambe cu ta danki na e perseverancia di Dr. Cyril Zaandam, a haya e fondo pa por a completa e proyecto. 

Dia 4 di september 1992 un destaho publico a wordo organisa pa gobierno pa expande e facilidad. Eventualmente un facilidad nobo, Instituto Medico San Nicolas, Dr. Rudi Engelbrecht a wordo construi na 2003 y termina na 2004, situa na Pastoor Hendrikstraat 10, no mucho leu di esun bieu. E traspaso pa e facilidad nobo, incluiendo e staf y personal a tuma luga dia 29 di september 2004 y oficialmente habri dia 1 di october 2004, pa duna servicio civil. Dia 1 di juni 2005, el a bira un entidad publico legal. Un instituto medico pa cuido ambulatorio. Nos ta enfoca pa ofrece e cuido pashent di calidad di mas halto. Nos ta specialisa den tratamento di pashent cu enfermedadnan cronico no-transmisibel. 

Aña 2020 lo keda graba como uno historico pa Institutuo Medico San Nicolas, Dr. Rudi Englebrecht. Na Januari e aña aki Dr. Morena ta haci e prome operacion di retina den historia di Aruba. E mesun aña aki, a haci e prome bestraling den e clinica aki. Pabien. 

Dr. Nester Sanchez Chacin, specialista den radio oncologia ta splica cu actualmente nan tin mas di 180 pashent pa atende cu servicio di radio terapia. Locual a tuma luga biaha pasa tabata e culminacion di e 100 pashent cu a ricibi un tratamento.

Un tratamento di radio terapia por dura varios siman, tambe tin, depende e status di e pashent cu e cancer. Radio terapia ta un parti esencial pa logra e curacion di cancer di e pashent. Un tratamento cu no ta haci dolor, e no ta kima of e ta sinti, Dr. Sanchez Chacin ta splica. 

E duracion di e tratamento ta dura cinco minuut y ta un di e sistemanan mas moderno cu tin den e region. Sinembargo, un logro cu por atende cu pashent na Aruba, mirando cu den pasado e pashent mester a bay afo.

Dr. Sanchez Chacinta ta bisa cu antes e pashent tabata keda seis pa ocho siman den exterior, separa di nan famia, nan ambiente di nan cas y pais. Pero aki na Aruba nan por haci nan acividad normal y e ta miho pa e calidad di bida di e pashent.

Actualmente Dr. Sanchez Chacin ta bisa cu no ta problema pa cupo, pero si kier keda modernisa, tin tratamento mas avansa. Ta spera cu pa otro aña por haya oro sistema tambe mas avansa cu e tratamentodi radio terapia.

IMSAN a bira un hospital

Entrante 1 di April 2021, a yega na e finalisacion di e proyeco di expansion y renobacion di IMSAN, unda cu oficialmente e lo bira un hospital. Esaki ta un proyecto cu a bin ta tumando luga for di basta tempo, pero ta desde juli 2018 e trabounan a cuminsa. Segun Director di IMSAN, Sr. Joel Rajnherc, ta cuminsa cu un departamento cu yama Shortstay. Aki por keda algun anochi. No ta intencion pa pashentnan cronico cu tin cu keda mas cu siete siman den hospital. Esaki ta realmente e intencion pa e pashentan cu por opera, pero ta un tiki mas complica, cu no por bay cas mesun dia. 

Esaki ta cumpliendo un aña caba y cu hopi bon resultado. Debi na e sosten completo di Minister di Salubridad, Sr. Dangui Oduber pa por a haya e financiamento , AZV su cooperacion y cu ta trahando conhuntamente cu Dr. Horacio Oduber Hospital (HOH), pa percura pa tin mas posibilidad pa tratamento di e pashentnan di Aruba.

A cuminsa e proyecto informando San Nicolas cu ta bay  haya un hospital y dia 1 di April lo bay yega y cumpli cu e promesa cu San Nicolas tambe lo tin un hospital. Esaki ta realmente algo pa celebra pero situacion no ta permiti na e momento aki pa por haci un aperura official.

Tin cambernan cla na IMSAN. Segun Dr. Rajnherc, tin 22 cama disponibel cu ta hinca den 12 camber. Tin 10 camber unda dos cama ta hinca aden pa pashent y nan ta completamente ekipa. Tur cos pa monitor e pashent ta presente den e camber. E monitor ta conecta cu un terminal central pa e enfermero y dokternan pa observa e pashent 24/7. Tur camber tin su propio sistema di oxigeno y vacuum. Tambe tin sistema pa yama e enfermero. Tur cos ta ahusta riba e sistema central di henter e hospital. Tur cos ta comunica cu otro, segun Dr. Rajnherc. Cada camber tin su propio baño. Tambe tin nan propio cashi unda por pone tur pertenencia personal separa.

Mas cupo di trabou:

Ya IMSAN a tuma den servicio aproximadamente 13 persona adicional pa yuda pa duna cuido. No ta bay cuminsa cu tur e 22 camanan den un solo biaha. Semper por tin algun cambio pa haci den logistica. Pesey ta cuminsa cu un serie di aproximadamente cuatro camber, cu ta traduci den ocho cama, caminda cu pashentnan por keda. A base di esaki ta percura cu tur cos cu a pone riba papel, e proyecto cu ta kere cu a haci bon, ta bay check si den realiad ta cumpli tambe.

Tur cos ta cla pa mira si por cuminsa cu esey. Probablemente e prome pashentnan ta drente dia 12 di April. Dia 1 di April ta cay riba un dia di fiesta. Mesora despues tin Pasco Grandi y e siman despues henter personal tin un paar di dia pa custumbra cu tur e aparatonan y henter e departameto. Ora cu esey tuma luga, e siman despues, riba un dialuna, ta spera cu por cuminsa tuma pashent.

Apertura oficial di IMSAN como hospital:

Dialuna atardi, dia 12 di April 2021, Minister di Salubridad Publico, Sr. Dangui Oduber, tabata presente na e apertura oficial di IMSAN cu a wordo converti den un hospital di 22 camber pa estadianan corto. E mandatario a expresa cu su persona semper a kere den IMSAN y pesey a zorg tambe pa inverti den e instituto pa haci esaki un realidad. E mandatario ta sigura pueblo di Aruba cu e gobierno aki ta pone e ser humano central y cu hechos ta demonstra esaki tambe. E vision di gobierno tabata dirigi riba mehoracion di cuido, inversion den cuido y trata mas pashent na Aruba mes. E maneho y vision di minister Dangui Oduber tabata dirigi riba haci inversionnan den cuido, mehora e calidad di cuido y servicio y percura pa trata mas pashent posibel na Aruba mes.

Minister Dangui Oduber a expresa den nomber di gobierno con contento, satisfecho y orguyoso e ta cu IMSAN su vision y su desaroyonan pa cu cuido medico na Aruba. Esaki ta cuadra cu e vision di gobierno di Aruba cu ta pa mehora e calidad di cuido na Aruba como tambe crea un plan sostenibel pa Aruba pa asina e fondonan di AZV ta sostenibel pa den futuro. Esaki sigur ta cuadra cu vision di nos gobierno.

E proyecto completo di IMSAN ta conta cu un inversion di mas o menos 60 miyon florin. Ta importante pa pueblo di Aruba sa con e placa a wordo inverti. E expansion y renobacion di IMSAN a percura pa genera 50 cupo di trabou. 

E proyecto den su totalidad ta encera su afdeling di radio therapie. Esaki ta nifica cu pashentnan residencia aki na Aruba no mester bay mas den exterior pa esaki. Tambe a bin cu afdeling radiologie, aki IMSAN tin tambe awo un mashin di CI Scan y dos mashin pa haci echo.

A bin cu un oogpolikliniek cu ta haci posibel pa entre otro tur specialistanan di wowo aki na Aruba por traha central na IMSAN cu e ekiponan nobo di wowo. Caminda ya caba varios operacionnan di retina a keda realisa.

IMSAN tin awo su mesun sala di operacion cu e mashinnan mas avansa, e narcoze lo wordo haci na IMSAN mes ya cu nan tin nan mesun anestesista. Banda di esaki IMSAN tin tambe awo un afdeling sterilisatie van medische instrumenten cu ta percura pa tur instrument keda limpi y sterilisa.

IMSAN tin su propio spoed eisende hulp cu cambernan pa ricibi adulto y tambe tin un camber special pa atende cu mucha.

Manera a yega di menciona caba anteriormente, IMSAN ta traha conhuntamente cu Baptist Health International pa guarantisa proceduranan medico riba novel di calidad halto y asina percura pa IMSAN ricibi acreditacion internacionalmente for di “Joint Commission International Accreditation (JIC).

Minister Dangui Oduber ta sumamente orguyoso di a pone e fondonan disponibel por medio di AZV pa asina cumpli cu e vision di su Ministerio y Gobierno cual ta mehora e calidad di cuido medico di Aruba. Cambionan grandi tumando luga den salud publico na Aruba. E cambionan aki lo ta na beneficio di nos comunidad y asina Minister Dangui Oduber ta cumpli cu e promesa di trece mehoracion den cuido. Sigur un otro logro historico pa cuido medico na Aruba. Pariba di brug tin su hospital.      

Urgent Care Aruba (UCA):

Urgent Care Aruba ta situa na Noord 63, Noord Medical Center, y ta ofrece cuidonan primario y urgente di malesanan sin menasa di morto y lesionnan na un costo rasonabel, cu masha poco tardansa. Funda pa un famia local y seis dokter cu casi 30 aña di experiencia riba e isla. Nan por ofrece solucion eficiente, confiabel y rapido na cualkier reto medico, sea chikito of grandi. E centro ta dirigi pa Dr. Carlos Yagua, Jr., un medico general cu dobel grado di master den cuido di salud y administracion.   

E centro ta bunita presenta cu kambernan di consulta pa adulto y pashentnan pedriatico ta completamente ekipa cu cu e aparatonan medico di mas moderno pa examinacionnan cu punto di atencion y un laboratorio clinicamente  acredita y certifica di nivel III, permitiendo dokternan pa obtene resultado den menos di un ora, garantisando diagnosis confiabel y cuido rapido. 

Medcare Clinic:

Medcare Clinic ta situa na J.E. Irausquin Blvd. 330 na Noord. Ta ofrece servicio y salud di alta calidad pa nos hendenan, turista y Caribe Hulandes. Nos ta ofrece cuido di salud di acuerdo cu e standardnan Hulandes, tumando na cuenta e tereno amplio di medicina, legislacion aplicabel y registracion.

Medcare Clinic ta compremeti pa mehorando acceso na consistencia y di slaud publico di calidad ta ofrece mediconan altamente cualifica den facilidadnan moderno y di lo ultimo. 

Medcare Clinic ta dedica na cuido central pa pashent pa henter e famia. Mediconan cualifica tin un variedad di experiencia y interes pa cumpli cu bo necesidadnan den nos clinica. Nos staf ta dedica pa haci bo bishita lo mas agradabel y eficiente posibel. Nos ta aprecia e amistad duradero cu nos forma cu e pashent y famianan cu nos sirbi. 

Medcare Clinic tey pa tur hende. Nos tin un ekipo profesional cu ta traha cu hopi pasion y amor pa pa haci bo sinti bon mas lihe posibel. Na Medcare Clinic, e miho servicio y hospitalidad riba e isla ta garantisa, pa bo y bo famia. Pesey nos ta traha cu solamente bon dokternan for di Hulanda cu educacion di standard altamento cualifica y registra. Nan ta pone tempo y esfuerso pa inovacion medico pa haci uso di ultimo tecnologia y ekiponan technico.

Dufi Kock
Escritor y Historiado
Savaneta 125-F
Cel: 592-9417
dufioc@gmail.com

2006 Lid in de Orde van Oranje Nassau – Reina Beatrix
2013 Honor & Respect from Battle Blaauw Curacao
2017 Personahe Prominente di Nos Pais – Archivo Nacional Aruba
2018 Prome Baluarte di Savaneta Ministerio Social y Labor Glenbert Croes
2018 Honorable Member of Blaauwbaai Foundation Curacao
2018 Miembro Honorario Fundacion Lanta Papiamento
2018 Miembro Honorario Museo di Antiguedad Nos Bieunan
2019 Contribuidor Den Engrandece nos Coleccionnan Nacional
2020 Reconocimento Fundacion Venezolanos Unidos en Aruba 

Juni 20, 2021