“Arubadag” (dia di Aruba) ta e dia cu Arubianonan na Hulanda ta celebra nan propio “dia di Himno y Bandera”. Riba 18 di Maart cu ta un dia di fiesta nacional, Aruba completo ta celebra e echo cu Pais Aruba tin su Himno y su Bandera.
Hopi emocion tabata reina na momento cu a presenta nos Himno, nos Bandera y nos Escudo Nacional na henter pueblo di Aruba den Wilhelmina Stadion na Dakota. Mientras cu pa prome biaha a hisa e bandera di Aruba den Wilhelmina Stadion, e composicion di Padu Lampe y areglo di Rufo Wever “Aruba Dushi Tera” a wordo canta oficialmente como Himno di Aruba. Henter e pueblo di Aruba a asisti masalmente pa duna honor na nos Bandera y nos Himno.
Arubadag manera cu awe nos conoce
Durante e periodo prome cu esaki, hopi Arubiano tanto na Aruba como na Hulanda a sa di duna nan contribucion. E “Arubadag” cu nos conoce awendia a wordo introduci na aña 1982 dor di un grupo di yiunan di tera. Personahenan manera Edwin Illidge (ex propietario di “Hooiberg Restaurant/Dancing” na Rotterdam), fundacionnan manera CAR y Cas di Aruba (Arubahuis) na Den Haag bou di supervision di Sra. Nuris Dabian a percura pa e comunidad Arubiano na Hulanda por celebra nan “Dia di Himno y Bandera”.
E prome dia di Aruba
Pa nos mira e prome dia di Aruba nos tin cu bai atras te na 6 di juni 1976. Na 1976 un grupo di Arubiano bou direccion di Sra. Rosina “Dechi” Langedijk Thijssen ( cu tambe ta fundadora di “Aruba Isla di Oro”) a tuma e iniciativa pa organisa e prome dia di Aruba. Na e momentonan ey Sra. Dechi Thijssen no tabata un desconoci, especialmente pa loke ta trata e lucha pa Aruba su Status Aparte. Na diferente ocacion el a organisa reunionnan cu Arubianonan na Hulanda. Sra. Dechi Thijssen a bombardea e Gabinete Hulandes di e tempo ey cu varios cartanan skerpi, caminda cu el a declara su lucha pa Aruba (bou liderazgo di Gilberto “Betico” F. Croes) y tambe el a percura pa un comite di bon bini pa Sr. Gilberto “Betico” F. Croes na su yegada na Schiphol, Hulanda. Riba 7 di februari 1976 Sra. R. “Dechi” Langedijk a publica un articulo den e corant Hulandes “Trouw” caminda cu el a haci un yamada na tur Arubiano pa asisti na e edificio di Congreso na Den Haag pa sostene e delegacion bou di liderazgo di Betico Croes. Betico tabata na Hulanda pa purba convence e Gabinete “Den Uyl” di e tempo ey cu Aruba tin e derecho riba su propio autonomia. Arubianonan na Hulanda a reacciona masalmente na e yamada aki. Esaki naturalmente a bira un exito rotundo y posteriormente Sra. R. “Dechi” Langedijk Thijssen a publica un articulo pa gradici e asistencia masal di Arubianonan na Hulanda. Akinan ya caba el a uza e palabra “Arubadag” cual e lo a uza despues na e prome celebracion di dia di Aruba na Amsterdam.
Sra. Dechi tabata presente na Aruba riba 18 di Maart 1976, dia cu nos Bandera a wordo hisa y dia cu a presenta nos Himno pa prome biaha. Ora cu el a regresa Hulanda, Sra. Dechi a cuminsa planea e prome “Arubadag” riba diadomingo 6 di juni 1976.
Con Arubianonan a wordo informa
Sra. Dechi tabata haci uso di diferente publicacionnan den corantnan Hulandes pa mantene e comunidad Arubiano na Hulanda na altura di e celebracion di Arubadag. Mirando cu Sra. Dechi no tabata un desconoci pa e comunidad Arubiano e noticia a sa di plama rapidamente. Manera nan ta bisa den papiamento criyoyo na Aruba “un boca bisa otro”. E prome “Arubadag” tabata un experiencia unico pa tur esnan cu tabata presente.
Unda a tene e prome Arubadag
E prome “Arubadag” a wordo organisa na centro di bario Hofgeest den parti sureste di Amsterdam. No a cobra pa entrada durante e prome celebracion di “Arubadag”. Tur e cuminda y bebida tabata core riba cuenta di boluntarionan Arubiano bou guia di Sra. R. Langedijk-Thijssen.
Sra. Langedijk-Thijssen a habri e prome celebracion cu un speech, sigui pa interpretacion di nos himno nacional pa Sr. Pedro Croes riba su guitara, caminda cu esnan cu tabata presente a canta hunto cu ne. Simplemente un dia ameno y esaki tabata e origen di e Arubadag cu te dia di awe nos ta celebra.
Danki na otro Arubianonan cu na 1982 a re-inicia e organisacion di Arubadag y danki na Arubahuis cu den e añanan cu a sigui a inverti hopi tempo y energia den esaki, awe Arubianonan por celebra nan mesun dia di Himno y Bandera. Nos “Arubadag!”
Pero laga nos NO lubida e pionero, Sra. Rosina “Dechi” Langedijk-Thijssen cu a organisa e prome “Arubadag” y cu tabata e prome persona cu a uza e nomber “Arubadag” pa referi na e dia cu Arubianonan na Hulanda ta celebra orguyosamente nan propio Himno y Bandera.